By Толбо сумын Засаг дарга Б.Жанарбек нь Увс аймгийн 100 жилийн ойн хүрээнд зохион байгуулсан өсвөр үеийн жудо бөхийн баруун бүсийн аварга шалгаруулах тэмцээнд алтан медаль хүртсэн Ерланы Аннаг хүлээн авч, талархал илэрхийлэн, хүндэтгэл үзүүллээ.
Ерланбек овогтой Анна нь 2020 оноос жудо бөхөөр хичээллэж эхэлсэн бөгөөд энэ хугацаанд сум, аймаг болон улсын чанартай 30 орчим тэмцээнд амжилттай оролцсон туршлагатай тамирчин юм. Тэрээр аймгийн өсвөр насны жудо бөхийн 5 удаагийн аварга, бүсийн 4 удаагийн аварга, улсын 4 удаагийн аварга төдийгүй Оросын Холбооны Улсын Хош-Агаач районд болсон олон улсын өсвөр насны жудо бөхийн тэмцээнд хоёр удаа түрүүлсэн бахдам амжилтын эзэн юм.
Е.Аннагийн дасгалжуулагч багшаар түүний ээж Д.Сайрангүл ажилладаг бөгөөд түүний амжилтын ард гэр бүлийнхний тууштай дэмжлэг байдаг.
Тэрээр удахгүй Улаанбаатар хотод зохион байгуулагдах нийслэлийн өсвөр насны жудо бөхийн аварга шалгаруулах тэмцээнд оролцохоор бэлтгэлээ базааж байна.
Бидний зүгээс Е.Анна охиндоо цаашдын тэмцээнүүдэд нь өндөр амжилт хүсэн ерөөе!
ТОЛБО СУМЫН ЗАСАГ ДАРГЫН ТАМГЫН ГАЗАР
2025-03-31
