By 2025 оны 8 дугаар сарын 1-ний өдөр Баян-Өлгий аймгийн Толбо сумын байгаль хамгаалагчид ээлжит хяналт шалгалт хийх явцдаа тус сумын 6 дугаар багийн нутаг дэвсгэрт хууль бусаар ан хийсэн зөрчлийг илрүүллээ. Шалгалтын явцад Баян-Өлгий аймгийн Буянт сумын оршин суугч хоёр тарвага хууль бусаар агнасан нь тогтоогдсон бөгөөд түүнд Зөрчлийн тухай хуулийн дагуу гурван зуун нэгж буюу 300,000 төгрөгийн торгууль, 1,840,000 төгрөгийн нөхөн төлбөр ногдуулж, зөрчил үйлдэхэд ашигласан нэг галт зэвсгийг хураан авч, цаашид хуулийн дагуу шийдвэрлүүлэхээр аймгийн Өлгий сумын Байгаль орчны хяналтын улсын байцаагч Б.Шөгенд шилжүүлэн ажиллав. Мөн хууль бусаар агнасан хоёр тарвагыг Зоонозын өвчин судлалын төвийн мэргэжилтнүүдэд хүлээлгэн өгч, Тарваган тахлын эрсдэлээс сэргийлэх арга хэмжээ авсан болно. Иргэд та бүхэнд дараах зүйлийг анхааруулж байна. “Амьтны тухай” хуулийн 37.2 дахь заалтад заасны дагуу, амьтны аймагт учирсан хохирлыг Засгийн газрын баталсан экологи-эдийн засгийн үнэлгээг хоёр дахин өсгөж нөхөн төлүүлдэг. Энэ нь 2023 оны 7 дугаар сарын 5-ны өдрийн 260 дугаар тогтоолоор шинэчлэгдэн батлагдсан үнэлгээнд үндэслэдэг. Иймд иргэн та хууль зөрчин ан амьтныг агнах, барих, худалдаалах, тээвэрлэх үйлдлээс татгалзаж, байгалиа хайрлан хамгаалж, Тарваган тахал зэрэг зоонозын халдварт өвчнөөс өөрийгөө болон бусдыг хамгаалахыг уриалж байна.
ТОЛБО СУМЫН ЗАСАГ ДАРГЫН ТАМГЫН ГАЗАР
